مەکتەبی سیاسی یەکێتیی نیشتیمانی کوردستان لە پەیامێکدا رایگەیاند، پارتی دیموکراتی پێشکەوتنخوازی کورد لە سوریا، حزبێکی دێرین ولەمێژینەی رۆژئاوای کوردستانە، یەکەم پارتی سیاسی نەتەوەیی کوردییە لەرۆژئاوای کوردستان دامەزراوە و بەھەوڵ وتێکۆشان و قوربانیی خەباتی دەیان سەرکردە و ھاوڵاتی بەردەوامی پێدراوە، لەدیرۆکی ئەو بەشەی کوردستان جێدەستتان دیارە  و شانازی زۆرتان بەردەکەوێت.

دەشڵێت، "ھەر لەم یادە پرشکۆیە سڵاو دەنێرین بۆ رۆحی مامۆستا حەمید دەروێش کە دێرینترین سیاسەتمەداری رۆژئاوای کوردستانە و ھاورێ و دۆستی دێرینی سەرۆک و رابەری کۆچکردوو  مام جەلال بوو کە لە چەندین قۆناغ و وێستگەی ژیانیاندا پێکەوە خەباتیان بۆ  مافە رەواکانی گەلەکەمان کردوە و خەباتی نەتەوەییان لەم دوو پارچەیە کوردستان گرێداوە."

راشیگەیاند، " تەکید لە یەکریزی و پێکەوەیی ھەموو لایەنە سیاسیەکان دەکەینەوە لە رۆژئاوای کوردستانـ ، ئەمە بە گرەنتی  پاراستنی دەستکەوتەکان و مافی رەوای گەلەکەمان دەبینین، بۆیە ھانی ھەموو لایەن و ھێزە سیاسیەکان دەدەین بەرژەوەندییە باڵاکانی نەتەوەکەمان لە پێشەوەی ھەموو بەرژەوەندییەکان ببین و ناکۆکیەکانیان بەلاوەبنێن و یەکدەست و یەک ھەڵوێست بەرەنگاری ھەموو ئالنگارییەکان ببنەوە."