وەزارەتی دەرەوەی ئەمریكا هۆشداری دەداتە هاووڵاتییانی لە رۆژهەڵاتی ناوەڕاست و دەڵێت، ئەگەر هەیە سەرجەم گەشتە ئاسمانییەكان لە رۆژهەڵاتی ناوەڕاست رابگیرێن.

وەزارەتی دەرەوەی ئەمریكا لە راگەیەنراوێكدا بڵاویكردەوە، نوێترین پێشهاتە ئەمنییەكانی رۆژهەڵاتی ناوەڕاست رەنگە ببێتە هۆی راگرتنی سەرجەم گەشتە ئاسمانییەكان لە ناوچەكە.

ئەوەشی خستەڕوو، پێویستە هاووڵاتییانی ئەمریكا لەپێناو پاراستنی گیانی خۆیان، ئاگاداری دوایین هۆشدارییەكان بن كە لەلایەن لایەنە پەیوەندیدارەكانەوە دەردەكرێت.

وەزارەتی دەرەوەی ئەمریكا دەشڵێت، ئەگەری هێرشكردنەسەر هاووڵاتییانی ئەمریكی لەلایەن ئێران و حوسییەكانی یەمەنەوە هەیە.

وەزارەتی دەرەوەی پاکستان بڵاویدەکاتەوە کە ئەگەری هەیە خولێکی نوێی راوێژکاری لەنێوان وڵاتانی ئەندام لە 'رێککەوتنی مەککە' و ئێراندا بەڕێوەبچێت و دەشڵێت: ئەم رێککەوتنە تەنها بۆ بەرگریکردنە لە وڵاتانی ئەندام و هێرشناکاتە سەر هیچ لایەنێک.

سەجاد حەیدەرخان، وتەبێژی وەزارەتی دەرەوەی پاکستان لە کۆنگرەیەکی رۆژنامەوانیدا رایگەیاند، رۆژی 26ـی مانگی رابردوو، کۆبوونەوەیەک بە بەشداریی نوێنەرانی پاکستان، سعودیە، تورکیا و ئێران لە تاران ئەنجامدراوە و یەکەمجاریش بووە کۆبوونەوەیەکی لەو جۆرە ئەنجام بدرێت.

وتیشی: لە کۆبوونەوەکەدا سەرجەم لایەنەکان ئامادەییان نیشانداوە بۆ بەردەوامیدان بە هەماهەنگی و پەیوەندییەکانیان لە داهاتوودا، بەڵام لە ئێستادا رێککەوتنی مەککە لە سێ دەوڵەت کە لە پاکستان، سعودیە و تورکیا پێکدێت و هەر بڕیارێک بۆ فراوانکردنی و وەرگرتنی ئەندامی نوێ، پەیوەستە بە رەزامەندیی وڵاتانی ئەندام. 

جەختیشی کردەوە، بەڕێوەچوونی کۆبوونەوەی راوێژکاری لە تاران، ئەو راستییە دەسەلمێنێت کە ئەم هاوپەیمانێتییە تەنها بەرگرییە و هیچ وڵاتێک ناکاتە ئامانج.

لە کۆتایی لێدوانەکەیدا ئەوەشی خستەڕوو، تائێستا هیچ هەنگاوێکی رەسمی بۆ بەئەندامبوونی ئێران لەناو رێککەوتنەکەدا هەنگاوی کرداریی بۆ نەنراوە.

 

ئیسرائیل و ئەمریكا ئامادەكاری دەكەن بۆ ئەگەری دەستپێكردنەوەی جەنگ لە دژی ئێران، بەڵام تا ئێستا بڕیاری كۆتایی نەدراوە.

ماڵپەڕی ئەكسیۆس بڵاویكردەوە، دۆناڵد ترەمپ سەرۆكی ئەمریكا ئامادەكاری دەكات بۆ یەكلاكردنەوەی هەڵوێستی سەبارەت بە دەستپێكردنەوەی جەنگ لە دژی ئێران، ئەوەش دوای ئەوەی رۆژی پێنجشەممە كۆبوونەوەیەكی لەگەڵ راوێژكارە باڵاكانی ئاسایشی نیشتمانی ئەنجامدا بۆ تاوتوێكردنی دۆسێی ئێران.

وتیشی، فەرماندەیی ناوەندیی ئەمریكا 'سێنتكۆم' لە قۆناغی كۆتایی ئامادەكارییەكانییەتی بۆ ئەگەری دەستپێكردنەوەی جەنگ دژی ئێران، بەڵام تا ئێستا هیچ رێنماییەكی نوێیان پێنەگەیشتووە.

هاوكات، رۆژنامەی یەدیعۆت ئەهرۆنۆتی ئیسرائیلی بڵاویكردەوە، ئامادەكارییەكانی ئیسرائیل بۆ دەستپێكردنەوەی هێرشە سەربازییەكان بۆ سەر ئێران بەردەوامن، لە كاتێكدا فشارەكان بۆ سەر ترەمپ، روو لە زیادبوون دەكەن تا نەگەڕێتەوە ناو جەنگ، ئەوەش دوای ئەو شكستەی بەر پارتی كۆماری كەوت لە هەڵبژاردنەكانی نیوەی خولی كۆنگرێسدا.