ئێران دەستیکرد بە هێرش بۆ سەر ئیسرائیل
رەوەز
١٣ی حوزەیرانی ٢٠٢٥
پەیامنێری کوردسات نیوز لە تاران رایگەیاند؛ ئێران دەستی بە هێرشەکانی کرد بۆ سەر ئیسرائیل
نوێترین هەواڵەکان
ئاژانسێك ئاشكرایکرد، رۆژێك پێش ئەنجامدانی هێرشەكان، ئەمریكا سەدان موشەكی رادەستی ئیسرائیل كردووە.
ئاژانسی میدیڵ ئێست لە زاری دوو لێپرسراوی باڵای ئەمریكاوە بڵاویكردوەتەوە، ئەمریکا ئاگاداری هێرشەكانی ئیسرائیل بووە بۆسەر ئێران، بۆ ئەو مەبەستەش موشەكی تایبەتی رادەستی تەلئەبیب كردووە.
بە وتەی ئەو دوو لێپرسراوە كە ناویان ئاشكرانەكراوە، رۆژێك پێش دەستپێكردنی هێرشەكانی ئیسرائیل بۆسەر ئێران، 300 موشەكی هێڵفایەر كە ناوەكەی بە مانای "ئاگری دۆزەخ" دێت، لەلایەن ئەمریكاوە رادستی ئیسرائیل كراون.
ئیسرائیلیش لە رێگەی فڕۆكە جەنگییەكانیەوە سودی لەو موشەكانەی ئەمریكا وەرگرتووە بۆ هێرشكردنەسەر ئێران.
بەڕێوەبەری ئاژانسی نێودەوڵەتی وزەی ئەتۆم رایگەیاند، لەئاكامی هێرشەكانی ئیسرائیل بۆ دامەزراوەی نەتەنز لە ئەسفەهانی ئێران تیشكدانەوەی ئەتۆمی لەناوچەكەدا دروستبووە.
رافایل گروسی، بەڕێوەبەری ئاژانسی نێودەوڵەتی بۆ وزەی ئەتۆم، لە پەراوێزی كۆبوونەوەی نائاسایی ئەنجومەنی ئاسایشی نێودەوڵەتی تایبەت بە گرژییەكانی نێوان ئیسرائیل و ئێران رایگەیاند، لە ئاكامی هێرشەكانی ئیسرائیل بۆ سەر ئێران، وێستگەیەكی پیتاندنی یۆرانیۆمی ئەو وڵاتە لەناوبراو، كە تێیدا پیتاندنی یۆرانیۆم گەیشتووەتە ٪ 60.
ئەوەشی خستەڕو، بەهۆی هێرشەكانی ئیسرائیلەوە بۆ دامەزراوەی ئەتۆمی نەتەنز لە پارێزگای ئەسفەهانی ئێران، تیشكدانەوەی ئەتۆمی لەناوچەكەدا دروستبووە.
گروسی دەشڵێت، هیچ ئاماژەیەك نییە هێرشەكانی ئیسرائیل گەیشتبێتنە وێستگەكانی پیتاندنی یۆرانیۆم لە ژێر زەوی دامەزراوەی نەتەنز، بەڵام هێرشەكە زیانی بە ئامێرەكانی ناوەندی جێگۆڕكێی وزە گەیاندووە.
وەزارەتی پەروەردەی حکومەتی هەرێمی کوردستان راگەیەندراوێکی بڵاوکردەوە کە تێیدا هەموو تاقیکردنەوەکانی پۆلی 12ـی ئەم هەفتەی دوا خستووە.
بەپێی ڕاگەیەندراوەکە، “لەبەر بەرژەوەندی گشتی، ئەم هەفتەیە واتە لە سبەی رۆژی شەممە 14ـی 6ـی 2025ەوە هەموو تاقیکردنەوەکان لە قوتابخانە حکومی و ناحکومیەکان بە قوتابخانە ناحکومیە نێودەوڵەتیەکان و تاقیکردنەوەکانی وەزاری پۆلی 12ـی ئامادەیی بە هەموو بەشەکانیەوە دوا دەخرێت.”
لە راگەیەندراوەکەدا هاتووە، هەروەها تاقیکردنەوەکانی خولی دووەمی قوتابخانە حکومی و ناحکومیەکانیش هەمووی بۆ هەفتەی داهاتوو دوا خراون.
وەزارەتی پەروەردە جەختی لەسەر ئەوە کردەوە کە “لە هیچ ناوەندێکی خوێندنی وەزارەتی پەروەردە تاقیکردنەوەکان ئەنجام نادرێن.”
لە کۆتایی ڕاگەیەندراوەکەدا هاتووە کە “پاشتر لە رێگەی ڕاگەیەندراوێکەوە لە خشتەی تاقیکردنەوەکان ئاگادارتان دەکەینەوە.”