عیراق هەوڵدەدات دەرچەیەكی تر بۆ هەناردەكردنی نەوت لە رێگەی سوریاوە بكاتەوە بۆ كەمكردنەوەی پشتبەستن بە گەروی هورمز، هەرچەندە ئەو پرۆژە گەورەیە پشتگیری ئەمریكای هەیە و كۆمپانیای شیڤرۆن بەشداری تێدا دەكات، بەڵام بەپێی زانیاریی سەرچاوە ئاگادارەكان، جێبەجێكردنی قورسە و كات و تێچووی زۆرتری دەوێت بەراورد بەوەی راگەیەندراوە.

 

بەپێی ئاژانسی رۆیتەرز، كاركردن لە پرۆژەی هێڵی نوێی نەوتی عیراق-بانیاس، نزیكەی چوار ساڵی دەوێت و دوو هێندەی ئەو ماوەیەیە كە پێشتر بانگەشەی بۆ دەكرا، تێچووەكەشی 15 ملیار دۆلارە، پرۆژەكە سیستمێكی نوێیە كە كێڵگەكانی باشور و باكوری عیراق بە یەكەوە دەبەستێتەوە و لە حەدیسەوە دەگاتە بانیاس.

 

سكۆت بیسێنت وەزیری گەنجینەی ئەمریكاش رایگەیاندبوو، لە ماوەی دوو ساڵی داهاتوودا گرنگی گەروی هورمز كەم دەبێتەوە و زۆربەی هەناردەكان بە هێڵی بۆری دەگوازرێنەوە.

 

كۆتاییەكانی مانگی تەمموزی رابردوو، سوریا و عیراق یاداشتنامەی لێكتێگەیشتنیان لەگەڵ كۆمپانیای شیڤرۆنی ئەمریكی، تی ئای كاپیتاڵ و یوو سی سی هۆڵدینگی قەتەری ئیمزا كردووە، بۆ ئەنجامدانی لێكۆڵینەوە تەكنیكی و داراییەكان.

 

كۆمپانیای شیڤرۆن ئاماژەی بەوە كردووە، دەبێت لێكۆڵینەوە تەكنیكییەكان تەواو بكرێن بۆ دیاریكردنی پێویستییەكانی پرۆژەكە و دابینكردنی مافی بەكارهێنانی زەوییەكان لەلایەن حكومەتی نوێی سوریاوە.

 

سەرەڕای ئەوەی پرۆژەی هێڵی بۆری نەوتی عیراق-سوریا هەلێكی گەورەیە بۆ فرەجۆركردنی رێگاكانی هەناردەكردنی نەوت و كەمكردنەوەی قەیرانەكان، بەڵام رێگەیەكی درێژ و ئاڵۆزە و چەندین بەربەستی وەك تەواوكردنی لێكۆڵینەوەكان، مسۆگەركردنی زەوی و دابینكردنی سەرمایەی گەورەی لەبەردەمدایە.

 

بەپێی داتاكانی كۆمپانیای سۆمۆش، هەناردەی نەوتی عیراق لە رێگەی گەروی هورمزەوە بۆ 35 ملیۆن و 500 هەزار بەرمیل لە مانگی تەمموزدا دابەزیوە، بۆیە ئەو پرۆژە نوێیە وەك جێگرەوەیەك دەبینرێت بۆ هێڵە كۆنەكەی كەركوك-بانیاس، كە بەهۆی شەڕەكانەوە زیانی زۆری بەركەوتووە و ئێستا لەگەڵ تایبەتمەندییە نوێیەكاندا ناگونجێت.