دواجار لە چوارچێوەی پرۆسەی ئاشتی لە توركیا و باكووری كوردستان، ناوەڕۆكی یاسای پتەوكردنی یەكگرتنی نەتەوەیی و یەكپارچەیی كۆمەڵایەتی بڵاوكرایەوە، كە لە 12 مادە پێكهاتووە.

لە مادەی یەكەمدا ئاماژە بەوەكراوە، یاسای چوارچێوە كاتێك دەچێتە بواری جێبەجێكردنەوە، ئەنجومەنی ئاسایشی توركیا لە رۆژنامەی رەسمیدا بڵاویبكاتەوە، كە پارتی كرێكارانی كوردستان "پەكەكە" و كۆما جڤاكێن كوردستان "كەجەكە" بە كردار هەڵوەشاونەتەوە و چەكیان رادەستكردووە، یاساكە ئەو تاوانانەش دەگرێتەوە كە پەیوەندیدارن بە دامەزراندن، بەڕێوەبردن و ئەندامبوون و هاوكاریكردنی پەكەكە.

ماددەی دووەمی یاساكە تایبەتە بە دەستەواژەكان، دەستەواژەی رێكخراو بەكاردەهێنرێت بۆ پەكەكە و كەجەكە، دەستەواژەی دەستە و ئەنجومەنیش تایبەتە بە لیژنەیەك كە چاودێری جێبەجێكردنی یاساكە دەكات.

ماددەی سێیەمی یاساكە، تایبەتە بە لێكۆڵینەوە و دادگاییكردن، بۆئەو كەسانەی تاوانەكانیان سزاكەی لەژێر 15 ساڵە زیندانیكردنەوەیە و جێبەجێكردنی سزاكەی بۆ ماوەی 5 ساڵ دوادەخرێت، ئەگەر ئەو كەسانە هیچ تاوانێك ئەنجام نەدەن، دۆسێكەیان دادەخرێت و سزاكەیان بە هەژماكردوو تۆمار دەكرێت، واتە ئازاد دەبن.

ئەو كەسانەشی تاوانەكانیان سزاكەی لەسەروی 15 ساڵ زیندانیكردنە، ماوەی جێبەجێكردنی سزاكەیان 10 ساڵ دوا دەخرێت و هاوشێوەی كەسانی سزای خوار 15 ساڵ زیندانی مامەڵەیان لەگەڵ دەكرێت.

یاساكە كوشتنی بە ئەنقەست ناگرێتەوە كە لە چوارچێوەی كاری رێكخراویی و لە پێش یەكی حوزەیرانی ساڵی 2006 ئەنجام درابێت، لایەنە پەیوەندیدارەكانیش دەتوانن لەماوەی دوو هەفتەدا پەڵپ لە بڕیاری دواخستنی سزاكان بگرن.

لە مادەی چوارەمدا هاتووە، دادگا یان داواكاری گشتی توركیا پێداچوونەوە بۆ بڕیارەكانی دەستبەسەركردن و چاودێریی دادوەری دەكات و ئەو دۆسێیانەشی لە دادگای پێداچوونەوە یان لە دادگای باڵادان، هەڵدەوەشێنرێنەوە.

مادەی پێنجەم و شەشەمی یاساكەش دەڵێت، بڕیارەكانی دواخستنی سزاكان لە سیستمێكی ئەلیكترۆنیدا تۆمار دەكرێن، ئەگەر سوودمەندبوویەكی بڕیارەكە تاوانی نوێ ئەنجام بدات، دواخستنی سزاكەی هەڵدەوەشێتەوە و سەرلەنوێ دادگایی دەكرێتەوە.

ماددەی حەوتەمی یاساكە تایبەتە بە پێكهێنانی دەستەیەك لە گەورە لێپرسراوانی توركیا، كە بەدواداچوون بۆ جێبەجێكردنی یاساكە دەكات، دەسەڵاتی هەیە لیژنەی لاوەكی بۆ هەڵسەنگاندنی پرۆسەكە پێكبهێنێت و پێشنیازی یاسایی و ئیداریش پێشكەش دەكات، پەرلەمانی توركیاش لیژنەی چاودێری دروست دەكات بۆ بەدواداچوونی یاساكە و سەرۆكایەتی كۆماری توركیاش لێپرسراوی خانەی راپەڕاندنی لیژنەكە دەبێت.

ماددەی هەشتەمی یاساكە تایبەتە بە تۆماركردنی سەرجەم چەك و تەقەمەنی و كەرەستە جەنگییەكانی پەكەكە و كەجەكە دوای رادەستكردنیان و تۆماركردنیان لەلایەن وەزارەتەكانی ناوخۆ و بەرگری توركیاوە.

لە ماددەی نۆی یاساكەشدا ئاماژە بەوە كراوە، ئەو كەسانەی دەیانەوێت لە یاساكە سوودمەند بن، دەبێت لەماوەی شەش مانگدا دوای دەرچوونی بڕیاری جێبەجێكردنی یاساكە، داواكاری پێشكەشی داواكاری گشتی ناوچەكەیان بكەن.

ماددەی 10ی یاساكەش تایبەتە بە پارێزبەندی یاسایی، سەرجەم ئەو لایەنانەی بەشدار دەبن لە جێبەجێكردنی یاساكە پارێزبەندی یاساییان دەبێت، لە ماددەكانی 11 و 12ی یاساكەشدا هاتووە، یاساكە لە رۆژی بڵاوبوونەوەی لە رۆژنامەی رەسمی توركیا دەچێتە بواری جێبەجێكردنەوە و سەرۆك كۆماری توركیاش لێپرسراو دەبێت لە جێبەجێكردنی یاساكە.