سەرباری ئاڵۆزییە سەربازییەکان و ئاستەنگە لۆجیستییەکان، عیراق لە سەرەتای مانگی موحەڕەمەوە پێشوازی لە نزیکەی پێنج ملیۆن زیارەتکار کردووە بۆ بەشداری لە رێوڕەسمەکانی چلەی ئیمام حسێندا.

بەپێی وتەی شارەزایانی ئابووری، ئەگەرچی ئەم ژمارەیە بەراورد بە ساڵانی رابردوو دابەزینی بەخۆیەوە بینیوە، بەڵام هێشتا دەرفەتێکی زێڕینە بۆ بووژاندنەوەی ئابووریی وڵات کە بەهۆی کێشەکانی پلاندانان و تێکچوونی بارودۆخی ناوچەکەوە بەتەواوی نەقۆستراوەتەوە.

نزیکەی ٥ ملیۆن زیارەتکار و ڕێکاری ئەمنی

بەپێی دوا ئامارەکانی بارەگای کۆنترۆڵکردنی رێوڕەسمەکانی چلەی ئیمام حسێن لە نووسینگەی فەرماندەیی گشتیی هێزە چەکدارەکانی عیراق، ژمارەی ئەو زیارەتکارانەی لە یەکەم رۆژی مانگی موحەڕەمەوە تاوەکو ئێستا هاتوونەتە وڵات گەیشتووەتە چوار ملیۆن و 887 هەزار و 660 کەس.

دەسەڵاتدارانی بەغداد ئاماژەیان بەوە کردووە کە پلانێکی ئەمنی چڕ و توندیان بۆ پاراستنی گیانی زیارەتکاران و پێشکەشکردنی خزمەتگوزاری پێویست جێبەجێ کردووە.

کاریگەریی جەنگ و ئاستەنگە ئابوورییەکان

لە لایەکی ترەوە، سەرکردەکانی کەرتی گەشتوگوزار و میوانداری لە شارەنی نەجەف وکەربەلا ئاماژە بە بەربەستەکان دەکەن.

ئەزهەر کلش، جێگری سەرۆکی رابیتەی هۆتێلەکان لە پارێزگای کەربەلا، رایگەیاند کە ئاڵۆزی و جەنگی نێوان ئەمریکا و ئێران کاریگەرییەکی راستەوخۆ و نەرێنی لەسەر ئاستی هاتنی زیارەتکاران دروستکردووە، بەتایبەتی لە رووی ئاستەنگی دەستکەوتنی ڤیزا و سستبوونی جوڵەی فڕۆکەوانی.

کلش جەختیشی کردەوە: جەنگ تەنیا هۆکار نییە، بەڵکو "لاوازیی پلاندانانی حکومەت و ئیدارەکان" هۆکارێکی سەرەکییە بۆ ئەوەی بەپێی پێویست سوود لەم دەرفەتە ئابوورییە وەرنەگیرێت.

هەروەها سائیب ئەبو غەنیم، سەرۆکی کۆمەڵەی هۆتێلەکانی نەجەف روونی کردەوە کە 80٪ی داهاتی ناوخۆیی شاری نەجەف راستەوخۆ پشت بە زیارەتکاران دەبەستێت.

ئەبو غەنیم ئاشکرای کرد کە سەرباری ملیۆنیبوونی ژمارەی زیارەتکارانی ئەمساڵ، بەڵام ئاستی داهاتەکە بەراورد بە ساڵانی پێشوو بە شێوەیەکی بەربلاو کەمی کردووە.

 

گەشتیاریی ئایینی سەرچاوەیەکی فەرامۆشکراوی داهات

عیراق ساڵانە پێشوازی لە ملیۆنان زیارەتکار دەکات کە سەردانی مەزارگە و شوێنە ئایینییەکانی شارەکانی کەربەلا، نەجەف، کازمییە و سامەڕا دەکەن.

بەپێی ئامارە فەرمییەکانی گەشتوگوزار، ساڵی رابردوو ژمارەی گەشتیاران لە عیراق گەیشتە نزیكەی 10 ملیۆن کەس، کە 85٪یان گەشتیاری ئایینی بوون و داهاتێکی چەندین ملیۆن دۆلارییان بۆ وڵات دەستەبەر کردبوو.

شارەزایانی ئابووری دووپاتی دەکەنەوە کە ئەگەر حکومەتی عیراق ژێرخانی کەرتی گەشتوگوزاری ئایینی ببووژێنێتەوە و گەشەی پێبدات، ئەم کەرتە دەتوانێت ساڵانە چەندین ملیار دۆلار داهات بۆ خەزێنەی دەوڵەت دابین بکات و ببێتە جێگرەوەیەک بۆ رزگاربوون لە پشتبەستنی تەواوەتی بە داهاتی نەوت..