رابەری باڵای ئێران دەڵێت، كەمتەرخەم نابن لە وەڵامدانەوەی هێرشەكە  و دڵنییایش دەدات لەوەی، ئەو هێرشە بەبێ زیان بەسەر ئیسرائیل تێپەڕنابێت.

عەلی خامنەیی، رابەری باڵای ئێران لە پەیامێكی ڤیدۆییدا بۆ گەلی ئێران رایگەیاند، كەمتەرخەم نابن لە وەڵامدانەوەی هێرشەكەی ئیسرائیل و هێزە چەكدارەكانی ئێران بە هەموو توانایانەوە وەڵامی ئەو هێرشە دەدەنەوە و ئیسرائیل بێچارە دەكەن.

لە پەیامەکەیدا هاتووە؛ ئەو بابەتەی حەزم دەکرد لەگەڵ گەلی ئازیزماندا باسی بکەم ئەوەیە کە رژێمی زایۆنی هەڵەیەکی گەورەی کرد، هەڵەیەکی گەورەی کرد، کارێکی هەڵەی کرد و دەرەنجامەکانی، بە یارمەتیی خودا چارەڕەشی دەکەن.
خامنەیی دڵنیاییش دەداتە گەلی ئێران، كە لە وەڵامدانەوەی هێرشەكەی ئیسرائیل شكست ناهێنن.

عەلی خامنەیی رێبەری باڵای ئێران، ئەمیر حاتەمی وەك فەرماندەی گشتی سوپای ئێران دەستنیشانكرد.

عەلی خامنەیی، رێبەری باڵای ئیسلامی ئێران، لە دوای كوژرانی محەمەد باقری لە هێرشەکەی ئەمڕۆی سوپای ئیسرائیل دا، رایگەیاند کە ئەمیر حاتەمی وەك فەرماندەی گشتیی سوپای ئێران و جێگرەوەی باقری دەستنیشان كردووە.

هەر ئەمڕۆ عەلی خامنەیی محەمەد پاكپوری وەك فەرماندەی نوێی سوپای پاسدارانی ئێران دەستنیشان كرد و لە یەكەم لێدوانیشیدا جەختی لەوە كردەوە، ئیسرائیل بە دەرئەنجامە گەورە و وێرانكەرەكانییەوە تووشی چارەنووسێكی تاڵ و پڕ لە ئازار دەبێت.

ئەمیر حاتەمی، هەمیشە لە لێدوانەکانیدا دژ بە ئیسرائیل و ئەمریکا دەوەستێتەوە و وەک دوژمن ناویان دەبات.

پەیامنێری کوردسات نیوز لە تاران رایگەیاند؛ ئێران دەستی بە هێرشەکانی کرد بۆ سەر ئیسرائیل